|
Ericus
Kästner: „Baronis Mynchusani mirabilia itinera et pericula marina
terrestriaque“.
In Latinum vertit Nicolaus Gross.
Baronis Mynchusani
phantasticae narratiunculae mendaces – a magno Erico Kästner litteris mandatae
– quae iam pridem referendae sunt in numerum librorum puerilium classicorum,
etiam 60 annis postquam primum publicatae sunt, iterum iterumque eduntur necnon
ab adultis solent legi libentissimê.
Quis non recordatur res
tam iocosê fictas quam Mynchusanum globo cannonis insidentem per aera volantem?
equum illum mediâ hieme Russicâ e turri ecclesiae pendentem? caballum semper
semperque sitientem, cui defuit pars corporis posterior? cervum, cuius in
fronte creverat arbor cerasi? sagulum, quod inciderat in morbum rabiei? lupum,
qui equum sclodiae Mynchusani adiunctum devoravit eiusque in loco sclodiam
traxit? anates, quas Mynchusanus lardo
allexerat, quibuscum per aera perque caminum volavit et denique appulsit focum
domesticum? ducem illum generalem, cuius calvaria erat laminâ argenteâ
instructa, ursum Turcicum, qui melle allectus ipse se temoni currûs infixit?
Mynchusanum fabâ celeriter crescente ad lunam ascendentem? eundem incidisse in
incolas lunares, qui capita sua sub bracchiis gestarent? eqs. eqs. ....
Hic
libellus Erici Kästner, cui insunt sales et facetiae, fideliter in Latinum est
conversus, additae sunt imagines iocosae, partim versicolores a Valthero Trier
pictae, quibus opusculum fiat lepidissimum. Versio Latina est simplex et in tot
partes divisa, ut etiam tirunculis fiat lectio sat commoda. Itaque libellus
Mynchusani Latinus aptissimus est ad animos discipulorum relaxandos, qui solent
lectione classicorum canonicâ vehementer intendi.
Bruxellis Belgarum, in Aedibus Fundationis, q.d. "Melissa", 2001
Editio originalis: Des Freiherrn von Münchhausen wunderbare Reisen
und Abenteuer zu Wasser und zu Lande.
Ab Erico Kästner denuo narrata, a Valthero Trier undecim picturis multisque lineamentis illustrata.
Verlag Carl Ueberreuter, Wien Heidelberg, Copyright 1951 by
ATRIUM VERLAG A.G. Zürich
|
